Carlo Sommonte

Sta tutto ‘o juorne allerte a faticà
pe fa meglio che po’ chistu mestiere.
Cu ‘nu surriso t’invita a t’assettà
e po’ se mette all’opera: è ‘o Bbarbiere!

E, mentre tu te sistieme int’a pultrone,
te mette ncuolle nu panno prufumate,
ca tene propriamente ‘na funzione
e lassà ‘e veste comme l’he purtate.

E subito accummence a vuttà ‘e mane,
armate cu ‘e strumente suoje speciale,
forbice, pettene e ati cose strane,
ncapo a te move a ritmo musicale.

E te addumanne cumme stanne ‘e ccose,
comme se fa tra amice ‘e vecchia data,
mente isso taglia e acconcia senza pose
e accussì passa tutta ‘na jurnata.

All’improvvise sona ‘o campanielle,
tutto se ferma e vuò sapé ‘o pecché?
Se fa ‘na pausa pe nu mumente belle:
è arrivato ‘o guaglione d’o ccafè!

Ma subito doppe torna a faticà,
cu sciampe e barba te fa nu gran signore!
Cure e particolare pe t’accuntentà
e sta sicure ca isso ‘o ffà cu ‘o core.

Je ne cunosco uno ca è speciale:
uno alla moda e tene ‘a simpatie.
Je t’o cunsiglie: è assaje professionale.
Se chiamma Antonio ed è n’amico mie